„გურიის მოამბის“ დამფუძნებელი მზია ამაღლობელის მხარდასაჭერ აქციას მართავს

„გურიის მოამბის“ დამფუძნებელი და ჟურნალისტი ვლადიმერ მენაბდე ორი დღეა, აქცია მართავს „ბათუმელების“ და „ნეტგაზეთის“ დამფუძნებლის მზია ამაღლობელის მხარდასაჭერად _ ის ბანერით ხელში გზის პირას დგას და ამაღლობელის გათავისუფლებას ითხოვს. „გუშინ, ვიმყოფებოდი ოზურგეთის-ქობულეთის ავტომაგისტრალის ექადია-ლიხაურის მონაკვეთზე. დღეს ვართ ოზურგეთის-ჩოხატაურის მაგისტრალის დვაბზუს მონაკვეთზე. მთავარი მესიჯია თავისუფლება მზიას და ვითხოვთ აუცილებლად მის გათავისუფლებას“, _ ამბობს ვლადიმერ მენაბდე. ვლადიმერ მენაბდის მიერ გავრცელებული ინფორმაციით, ის მსგავსს აქტივობებს გურიის გარეთაც აპირებს: „შემდეგ იქნება ბათუმი, თბილისი... ასევე, მოვივლით ყველა სოფელსა და დასახლებას გურიაში. ვისაც არ შეგიძლიათ თბილისში ან სხვაგან წასვლა, გამოდით საკუთარი სახლების წინ, დღეში თუნდაც 5 წუთი, ტრანსპარანტებით _ „თავისუფლება მზია ამაღლობელს“ „თავისუფლება სინდისის პატიმრებს“. გაიგონ, რომ ყველგან ვართ და მოსვენებას არ მივცემთ რუს ოკუპანტებს“, _ აღნიშნულია ვლადიმერ მენაბდის გავრცელებულ ინფორმაციაში.