შავი ზღვის სანაპირო ზოლსა და ყველა საგუშაგოზე თეთრი ალმები აღიმართა

შინაგან საქმეთა სამინისტროს საგანგებო სიტუაციების მართვის სააგენტომ შავი ზღვის სანაპირო ზოლსა და ყველა საგუშაგოზე თეთრი ალმები აღმართა, რაც იმას ნიშნავს, რომ ზღვაში შესვლა უკვე უსაფრთხო და დასაშვებია. შსს-ს ინფორმაციით, შსს-ს წყალზე მაშველებმა ბოლო 24 საათის განმავლობაში, 4-5 ბალიანი შტორმის პირობებში, საქართველოს, აშშ-ს, უკრაინის, აზერბაიჯანის, სომხეთის, რუსეთისა და სხვა ქვეყნის 46 მოქალაქის გადარჩენა შეძლეს. მათ შორის, ყველაზე მცირეწლოვანი 7 წლის გოგონა იყო. შინაგან საქმეთა სამინისტროს ცნობით, შსს-ს საგანგებო სიტუაციების მართვის სააგენტოს წყალზე მაშველების ეფექტური, ოპერატიული და მობილიზებული მუშაობის შედეგად, შავ ზღვაზე შტორმის დროს, არც ერთი ფატალური შემთხვევა არ დაფიქსირებულა.