ხარკოვში რუსულ დაბომბვას კიდევ 10 ადამიანი ემსხვერპლა

ხარკოვის ოლქში რუსული დაბომბვის შედეგად, კიდევ 10 ადამიანი დაიღუპა, მათ შორის რვა წლის ბავშვი. ამის შესახებ ხარკოვის ოლქის სამხედრო ადმინისტრაციის ხელმძღვანელი ოლეგ სინეგუბოვი Telegram-ზე წერს. სინეგუბოვის თქმით, ზოლოჩივის თემის სოფელ უდის დაბომბვის შედეგად დაიღუპა 3 მშვიდობიანი მოქალაქე. დერგაჩოვის თემში, ბეზრუკში დაბომბვისას 8 წლის გოგონა დაიღუპა, დედამისი კი დაიჭრა. გარდა ამისა, ჩუგუევის მერმა გალინა მინაევამ განაცხადა, რომ წინასწარი მონაცემებით, 21 ივნისს ქალაქის დაბომბვის შედეგად 6 მშვიდობიანი მოქალაქე დაიღუპა და 3 დაშავდა. მანამდე არსებული ინფორმაციით, რუსი დამპყრობლები დღეს თავს დაესხნენ ხარკოვს, რის შედეგადაც 5 ადამიანი დაიღუპა, 11 ადამიანი კი დაშავდა.